മുംബൈയിലെ മലാഡ് മേഖലയിൽ നാല് വർഷമായി ഫ്രീസറിൽ സൂക്ഷിച്ചിരുന്ന 80കാരന്റെ മൃതദേഹം കണ്ടെത്തിയത് പൊലീസിനെ അമ്പരപ്പിച്ചു. 2022ൽ സ്വാഭാവിക കാരണങ്ങളാൽ മരിച്ച വയോധികന്റെ മൃതദേഹമാണ് കുടുംബത്തിന്റെ നിർദേശപ്രകാരം ഒരു ക്ലിനിക്കിലെ ഫ്രീസറിൽ സൂക്ഷിച്ചിരുന്നത്. സംഭവത്തിൽ നിലവിൽ ദുരൂഹതയോ മരണത്തിൽ മറ്റെന്തെങ്കിലും ഇടപെടലോ കണ്ടെത്തിയിട്ടില്ലെന്നാണ് പൊലീസ് വ്യക്തമാക്കുന്നത്.
മരണത്തിന്റെ ആഘാതത്തിൽ നിന്ന് മുക്തരാകാനാകാതിരുന്ന കുടുംബം മൃതദേഹം ദീർഘകാലം സംരക്ഷിക്കാൻ തീരുമാനിക്കുകയായിരുന്നു. ഭാവിയിൽ വൈദ്യശാസ്ത്രവും സാങ്കേതികവിദ്യയും കൂടുതൽ പുരോഗമിക്കുമ്പോൾ മരിച്ചവരെ പുനരുജ്ജീവിപ്പിക്കാൻ കഴിയുമെന്ന പ്രതീക്ഷയിൽ അമേരിക്കയിലെ ക്രയോണിക്സ് സ്ഥാപനവുമായി ബന്ധപ്പെടുകയും മൃതദേഹം അവിടേക്ക് മാറ്റാനുള്ള സാധ്യതകൾ പരിശോധിക്കുകയും ചെയ്തതായി പൊലീസ് പറഞ്ഞു.
കുരാർ പൊലീസിന് ലഭിച്ച വിവരത്തെ തുടർന്ന് ക്ലിനിക്കിലെത്തിയപ്പോഴാണ് ഫ്രീസറിനുള്ളിൽ മൃതദേഹം കണ്ടെത്തിയത്. ക്ലിനിക്ക് ഏകദേശം ഒരു മാസമായി അടച്ചിട്ടിരുന്നതായും റിപ്പോർട്ടുകളുണ്ട്. മൃതദേഹം സൂക്ഷിച്ചിരുന്ന കാര്യം ക്ലിനിക് നടത്തിപ്പുകാർക്കും കെട്ടിട ഉടമയ്ക്കും അറിയാമായിരുന്നില്ലെന്നാണ് പൊലീസ് പറയുന്നത്.
ക്രയോണിക്സ് എന്നത് നിയമപരമായി മരിച്ച വ്യക്തികളുടെ ശരീരം അത്യന്തം താഴ്ന്ന താപനിലയിൽ സംരക്ഷിച്ച് ഭാവിയിൽ ശാസ്ത്രത്തിന്റെ പുരോഗതിയിലൂടെ അവരെ പുനരുജ്ജീവിപ്പിക്കാനാകുമെന്ന പ്രതീക്ഷയിൽ നടത്തുന്ന പരീക്ഷണാത്മക രീതിയാണ്. എന്നാൽ മനുഷ്യരെ മരണശേഷം ഇത്തരത്തിൽ സംരക്ഷിച്ച് പിന്നീട് വിജയകരമായി പുനരുജ്ജീവിപ്പിക്കുന്ന സാങ്കേതികവിദ്യ നിലവിൽ തെളിയിക്കപ്പെട്ടിട്ടില്ല.
മൃതശരീരം ഇത്തരത്തിൽ സ്വകാര്യമായി ദീർഘകാലം സൂക്ഷിക്കുന്നതിന്റെ നിയമസാധുത, എത്രകാലം സൂക്ഷിക്കാനാകും തുടങ്ങിയ കാര്യങ്ങളിലാണ് പൊലീസ് ഇപ്പോൾ വിദഗ്ധരുമായി ആലോചിച്ച് അന്വേഷണം നടത്തുന്നത്. കുടുംബാംഗങ്ങളുടെയും ക്ലിനിക് അധികൃതരുടെയും മൊഴികളും പൊലീസ് രേഖപ്പെടുത്തിയിട്ടുണ്ട്. മൃതദേഹം സംസ്‌കരിക്കണമോ അതോ നിയമാനുസൃത നടപടികളിലൂടെ വിദേശത്തേക്ക് മാറ്റാനുള്ള സാധ്യത പരിശോധിക്കണമോ എന്ന കാര്യത്തിലും തീരുമാനമായിട്ടില്ല.
Note ; വാർത്തയ്ക്കായി ഉപയോഗിച്ചിരിക്കുന്ന ചിത്രങ്ങൾ ബെസോറ ന്യൂസിന്റെത് അല്ല . വാർത്തയുടെ പൂർണതയ്ക്കുവേണ്ടി മറ്റ് സോഴ്‌സുകളിൽ നിന്നും എടുത്തതാണ് .
