അമേരിക്കന്‍ നാവികസേനയുടെ യുദ്ധക്കപ്പല്‍ സംഘത്തില്‍ എട്ട് സൈനികര്‍ ആത്മഹത്യയ്ക്ക് ശ്രമിച്ചതായി നേവി സെക്രട്ടറി കോണ്‍ഗ്രസിനെ അറിയിച്ചു. ഇറാനെതിരായ സൈനിക നടപടികളില്‍ പങ്കെടുത്ത യുഎസ്എസ് എബ്രഹാം ലിങ്കണ്‍ വിമാനവാഹിനിക്കപ്പല്‍ ഉള്‍പ്പെടുന്ന സംഘത്തിലായിരുന്നു സംഭവങ്ങള്‍. ആക്ടിങ് നേവി സെക്രട്ടറി ഹങ് കാവോയാണ് സെനറ്റര്‍ കിര്‍സ്റ്റന്‍ ഗില്ലിബ്രാന്‍ഡിന് നല്‍കിയ കത്തില്‍ ഇക്കാര്യം വ്യക്തമാക്കിയത്.യുഎസ്എസ് എബ്രഹാം ലിങ്കണ്‍ ഉള്‍പ്പെടുന്ന കാരിയര്‍ സ്‌ട്രൈക്ക് ഗ്രൂപ്പിന്റെ വിന്യാസം ആരംഭിച്ചതിന് ശേഷമാണ് എട്ട് ആത്മഹത്യാശ്രമങ്ങള്‍ ഉണ്ടായത്. എന്നാല്‍ ഒരു സൈനികനും മരിച്ചിട്ടില്ലെന്ന് കത്തില്‍ പറയുന്നു.എന്നാല്‍ ഈ കണക്ക് യുഎസ്എസ് എബ്രഹാം ലിങ്കണ്‍ കപ്പലിലെ ജീവനക്കാരെ മാത്രം ഉള്‍പ്പെടുത്തിയുള്ളതല്ല.
വിമാനവാഹിനിക്കപ്പലിലെ ജീവനക്കാര്‍ക്ക് പുറമെ വിമാന വിഭാഗത്തിലെ ജീവനക്കാര്‍, യുദ്ധക്കപ്പല്‍ സംഘത്തിലെ അംഗങ്ങള്‍, മറ്റ് അനുഗമിക്കുന്ന കപ്പലുകളിലെയും വിമാന സ്‌ക്വാഡ്രണുകളിലെയും സൈനികര്‍ എന്നിവരും കണക്കില്‍ ഉള്‍പ്പെടുന്നു.ഏകദേശം 6,000 മുതല്‍ 7,000 വരെ സൈനികര്‍ ഉള്‍പ്പെട്ടതായിരുന്നു ഈ കാരിയര്‍ സ്‌ട്രൈക്ക് ഗ്രൂപ്പ്. ഇറാനെതിരായ അമേരിക്കന്‍ സൈനിക നടപടികളില്‍ ഇവര്‍ പ്രധാന പങ്ക് വഹിച്ചിരുന്നു.ദീര്‍ഘകാല സൈനിക വിന്യാസവും കടലില്‍ തുടര്‍ച്ചയായി കഴിയേണ്ടിവന്ന സാഹചര്യവും സൈനികരുടെ മാനസിക സമ്മര്‍ദ്ദം വര്‍ധിപ്പിച്ചതായി റിപ്പോര്‍ട്ടുകള്‍ പറയുന്നു.
യുഎസ്എസ് എബ്രഹാം ലിങ്കണ്‍ 286 ദിവസം വരെ കടലില്‍ തുടര്‍ന്നതായും റിപ്പോര്‍ട്ടുണ്ട്. ആദ്യം മേയില്‍ അവസാനിക്കേണ്ടിയിരുന്ന വിന്യാസം പിന്നീട് നീണ്ടുപോവുകയായിരുന്നു.സൈനികര്‍ക്ക് മാനസികാരോഗ്യ സഹായം നല്‍കുന്നതിനുള്ള സംവിധാനങ്ങള്‍ കപ്പലില്‍ ഉണ്ടായിരുന്നെന്നും നേവി സെക്രട്ടറി വ്യക്തമാക്കി. വിന്യാസത്തിനിടെ ഒരു സൈനികന്‍ കപ്പലില്‍ നിന്ന് കടലിലേക്ക് ചാടാന്‍ ശ്രമിച്ചെങ്കിലും സഹപ്രവര്‍ത്തകര്‍ തടഞ്ഞിരുന്നു. മറ്റൊരു സൈനികന്‍ കടലില്‍ വീണ സംഭവത്തിലും ഉടന്‍ രക്ഷാപ്രവര്‍ത്തനം നടത്തി ചികിത്സ നല്‍കിയതായി നേവി അറിയിച്ചു.ദീര്‍ഘകാല സൈനിക വിന്യാസത്തിനിടെ നാവികരുടെ മാനസികാരോഗ്യവുമായി ബന്ധപ്പെട്ട ആശങ്കകള്‍ ഉയരുന്നതിനിടെയാണ് കോണ്‍ഗ്രസിന് മുന്നില്‍ എട്ട് ആത്മഹത്യാശ്രമങ്ങളുടെ കണക്ക് പുറത്തുവന്നിരിക്കുന്നത്.
Note ; വാർത്തയ്ക്കായി ഉപയോഗിച്ചിരിക്കുന്ന ചിത്രങ്ങൾ ബെസോറ ന്യൂസിന്റെത് അല്ല . വാർത്തയുടെ പൂർണതയ്ക്കുവേണ്ടി മറ്റ് സോഴ്‌സുകളിൽ നിന്നും എടുത്തതാണ് .
