ആർട്ടിഫിഷ്യൽ ഇന്റലിജൻസിന്റെ നിയന്ത്രണവുമായി ബന്ധപ്പെട്ട് രാജ്യങ്ങൾ തമ്മിൽ ഒരു ആഗോള ധാരണ ഉണ്ടാക്കുന്നത് എളുപ്പമാകില്ലെന്ന് മൈക്രോസോഫ്റ്റ് സഹസ്ഥാപകൻ ബിൽ ഗേറ്റ്സ്. ശീതയുദ്ധകാലത്ത് ആണവായുധങ്ങളുടെ വ്യാപനം നിയന്ത്രിക്കാൻ അമേരിക്കയും സോവിയറ്റ് യൂണിയനും നടത്തിയ ചർച്ചകളേക്കാൾ ഇത് ബുദ്ധിമുട്ടായിരിക്കുമെന്നാണ് ഗേറ്റ്സ് പറഞ്ഞത്.
എഐയുടെ സുരക്ഷ ഉറപ്പാക്കാനുള്ള ചുമതല കമ്പനികൾക്ക് മാത്രം വിട്ടുകൊടുക്കാനാകില്ലെന്നും ഗേറ്റ്സ് വ്യക്തമാക്കി. നിയമപാലകരും രാഷ്ട്രീയ നേതാക്കളും സുരക്ഷാ മാനദണ്ഡങ്ങളും നിരീക്ഷണ സംവിധാനങ്ങളും എങ്ങനെയായിരിക്കണം എന്ന ചർച്ചയിൽ പങ്കാളികളാകണം. ഇക്കാര്യങ്ങൾ നിയമത്തിലൂടെ നിർബന്ധമാക്കണമെന്നും അദ്ദേഹം ആവശ്യപ്പെട്ടു. അതേസമയം, ഇത്തരം നിയന്ത്രണങ്ങൾ എഐ മേഖലയുടെ വളർച്ചയെ വലിയ രീതിയിൽ മന്ദഗതിയിലാക്കേണ്ട സാഹചര്യമില്ലെന്നും ഗേറ്റ്സ് പറഞ്ഞു.
ദുരുദ്ദേശമുള്ള ആളുകളുടെ കൈകളിലെത്തിയാൽ എഐ വലിയ അപകടമായി മാറാമെന്നും ഗേറ്റ്സ് മുന്നറിയിപ്പ് നൽകി. ഏറ്റവും പുതിയ എഐ സംവിധാനങ്ങൾ ദുരുപയോഗം ചെയ്യുന്ന ആളുകൾക്ക് വലിയ തോതിലുള്ള നാശനഷ്ടങ്ങൾ ഉണ്ടാക്കാൻ കഴിയുന്ന സാഹചര്യമുണ്ടാകാമെന്നാണ് അദ്ദേഹത്തിന്റെ വിലയിരുത്തൽ. മനുഷ്യരാശിക്ക് വലിയ നഷ്ടമുണ്ടാക്കുന്ന സംഭവങ്ങളിലേക്ക് എഐ നയിക്കാനുള്ള ശേഷിയുണ്ടെന്നും ഗേറ്റ്സ് പറഞ്ഞു.
ആണവായുധങ്ങൾ, വ്യോമയാന സുരക്ഷ, ഓസോൺ സംരക്ഷണം തുടങ്ങിയ വിഷയങ്ങളിൽ രാജ്യങ്ങൾ നേരത്തെ അന്താരാഷ്ട്ര ധാരണകളിലേക്ക് എത്തിയിട്ടുണ്ടെന്നും ഗേറ്റ്സ് ചൂണ്ടിക്കാട്ടി. എഐയുടെ കാര്യത്തിലും മനുഷ്യരാശിയുടെ പൊതുതാൽപര്യം മുൻനിർത്തി രാജ്യങ്ങൾ ഒരുമിച്ച് പ്രവർത്തിക്കേണ്ട സാഹചര്യമാണെന്നാണ് അദ്ദേഹത്തിന്റെ അഭിപ്രായം.
Note ; വാർത്തയ്ക്കായി ഉപയോഗിച്ചിരിക്കുന്ന ചിത്രങ്ങൾ ബെസോറ ന്യൂസിന്റെത് അല്ല . വാർത്തയുടെ പൂർണതയ്ക്കുവേണ്ടി മറ്റ് സോഴ്‌സുകളിൽ നിന്നും എടുത്തതാണ് .
