പശ്ചിമേഷ്യയിലെ സംഘർഷം അവസാനിപ്പിക്കാനുള്ള നയതന്ത്ര നീക്കങ്ങൾക്കിടെ പുതിയ വഴിത്തിരിവ്. ഹോർമുസ് കടലിടുക്കുമായി ബന്ധപ്പെട്ടും യുദ്ധം അവസാനിപ്പിക്കുന്നതുമായി ബന്ധപ്പെട്ടും ഉയർന്നുവന്ന നിർദേശങ്ങളിൽ അമേരിക്കയുടെയും ഇറാന്റെയും നിലപാടുകൾ തമ്മിൽ ഇപ്പോഴും ഭിന്നത തുടരുകയാണ്. അമേരിക്കൻ പ്രസിഡന്റ് ഡൊണാൾഡ് ട്രംപിന്റെ പ്രതികരണത്തിന് പിന്നാലെ തങ്ങളുടെ നിലപാട് വീണ്ടും വ്യക്തമാക്കിയിരിക്കുകയാണ് ഇറാൻ.
ഹോർമുസ് കടലിടുക്ക് വീണ്ടും തുറക്കുന്നതിനും യുദ്ധം അവസാനിപ്പിക്കുന്നതിനുമായി ഇറാൻ മുന്നോട്ടുവെച്ച സമാധാന നിർദേശം ട്രംപ് നിരസിച്ചതായി അറിയിച്ചതിന് പിന്നാലെയാണ് ഇറാൻ വിദേശകാര്യ മന്ത്രി അബ്ബാസ് അരാഗ്ചി പ്രതികരിച്ചത്. നയതന്ത്ര ചർച്ചകളിലൂടെ മാത്രമേ തർക്കങ്ങൾക്ക് പരിഹാരം കാണാനാകൂവെന്ന് അദ്ദേഹം സോഷ്യൽ മീഡിയയിലൂടെ വ്യക്തമാക്കി. ഇറാന്റെ വ്യവസ്ഥകൾ വ്യക്തമാണ് എന്നും കടലിടുക്ക് തുറക്കുന്നതിനുള്ള ഏത് നീക്കവും തങ്ങളുടെ ഉപാധികൾ അംഗീകരിക്കുന്നതിനെ ആശ്രയിച്ചിരിക്കുമെന്നും അരാഗ്ചി പറഞ്ഞു.
ന്യൂയോർക്കിൽ നടന്ന യു.എൻ പൊതുസഭാ സമ്മേളനത്തിനിടെയാണ് ഖത്തറി മധ്യസ്ഥർ വഴി ഇറാൻ സമാധാന നിർദേശം മുന്നോട്ടുവെച്ചത്. എന്നാൽ, ശനിയാഴ്ച മാധ്യമങ്ങളോട് സംസാരിച്ച ട്രംപ് നിർദേശം നിരസിച്ചതായി വ്യക്തമാക്കി. ഇറാന്റെ പരാജയവും നിരാശയുമാണ് ഇത്തരമൊരു കരാറിന് ശ്രമിക്കാൻ കാരണമെന്നാണ് ട്രംപ് ആരോപിച്ചത്. അതേസമയം, നയതന്ത്ര ചർച്ചകൾക്കുള്ള സാധ്യത പൂർണമായി തള്ളിയിട്ടില്ലെന്നും ഈ ആഴ്ച യു.എസ് പ്രതിനിധികൾ കൂടുതൽ ചർച്ചകളിൽ പങ്കെടുത്തേക്കുമെന്നും അദ്ദേഹം മറ്റൊരു അഭിമുഖത്തിൽ സൂചിപ്പിച്ചു.
അമേരിക്ക ഔദ്യോഗികമായി ഇറാന്റെ നിർദേശം തള്ളിയതായി മധ്യസ്ഥർ ഇതുവരെ അറിയിച്ചിട്ടില്ലെന്നാണ് അരാഗ്ചിയുടെ വിശദീകരണം. മധ്യസ്ഥരിൽ നിന്നുള്ള അന്തിമ നിലപാടിനായി കാത്തിരിക്കുകയാണെന്നും അതനുസരിച്ചായിരിക്കും തുടർനടപടികളെന്നും അദ്ദേഹം വ്യക്തമാക്കി.
അതേസമയം, ഉപരോധങ്ങൾ ഉടൻ പിൻവലിക്കണമെന്നും മരവിപ്പിച്ച ഇറാന്റെ സ്വത്തുക്കൾ വിട്ടുനൽകണമെന്നും ഇറാൻ ആവശ്യപ്പെട്ടതാണ് ട്രംപ് നിർദേശം നിരസിക്കാൻ കാരണമെന്ന് യു.എന്നിലെ യു.എസ് അംബാസഡർ മൈക്ക് വാൾട്സ് പറഞ്ഞു. ചർച്ചകളിലേക്ക് ഇറാൻ ആത്മാർഥമായാണ് എത്തുന്നതോ എന്ന കാര്യത്തിലും സംശയമുണ്ടെന്നും അദ്ദേഹം വ്യക്തമാക്കി.
Note ; വാർത്തയ്ക്കായി ഉപയോഗിച്ചിരിക്കുന്ന ചിത്രങ്ങൾ ബെസോറ ന്യൂസിന്റെത് അല്ല . വാർത്തയുടെ പൂർണതയ്ക്കുവേണ്ടി മറ്റ് സോഴ്‌സുകളിൽ നിന്നും എടുത്തതാണ് .
