യെമനിലെ അൽ മുഖ തുറമുഖത്തിന് സമീപം കപ്പലിന് നേരെ ഹൂതി ആക്രമണം നടന്നതായി റിപ്പോർട്ട്. കപ്പലിന് നേരെ തുടർ ആക്രമണങ്ങളും ഉണ്ടായതായാണ് വിവരം. ആക്രമണത്തിൽ കപ്പലിന് കാര്യമായ കേടുപാടുകൾ സംഭവിച്ചതായും റിപ്പോർട്ടുണ്ട്. സൗദിയുമായി ബന്ധമുള്ള കപ്പലുകൾക്കെതിരെ ഹൂതികൾ നടത്തുന്ന ആക്രമണത്തിന്റെ ഭാഗമായാണ് സംഭവമെന്നാണ് വിലയിരുത്തൽ.
സൗദി സഖ്യസേനയുടെ പിന്തുണയോടെ ഹൂതി കേന്ദ്രങ്ങൾ ലക്ഷ്യമാക്കി യെമൻ സർക്കാർ വലിയ സൈനിക നീക്കത്തിന് പ്രഖ്യാപനം നടത്തിയതിന് പിന്നാലെയാണ് പുതിയ ആക്രമണം. സമീപ ആഴ്ചകളിൽ യെമൻ സർക്കാർ സേനയ്‌ക്കെതിരെ ഹൂതികൾ സൈനിക മുന്നേറ്റം നടത്തിയതായും റിപ്പോർട്ടുണ്ട്. യെമന്റെ ചെങ്കടൽ തീരപ്രദേശത്തിന്റെ വലിയ ഭാഗം ഹൂതികളുടെ നിയന്ത്രണത്തിലാണെന്നും നിർണായക സർക്കാർ കേന്ദ്രങ്ങളിലേക്ക് ഭീകരർ മുന്നേറിയതായും റിപ്പോർട്ടിൽ പറയുന്നു.
സൗദി അറേബ്യക്കെതിരെയും ഹൂതികൾ നേരത്തെ ആക്രമണങ്ങൾ നടത്തിയിട്ടുണ്ട്. സൗദി അരാംകോയുടെ ഊർജ അടിസ്ഥാന സൗകര്യങ്ങൾ ലക്ഷ്യമിട്ടുള്ള ആക്രമണങ്ങളും ഉണ്ടായതായി റിപ്പോർട്ടുണ്ട്. റിയാദിലെ റിഫൈനറിയിലേക്ക് ഡ്രോൺ, മിസൈൽ ആക്രമണം എത്തിയതായും റിപ്പോർട്ടിലുണ്ട്. അതേസമയം, യെമൻ സർക്കാർ സേനയുടെ ശക്തികേന്ദ്രമായ തായിസിന് സമീപം സൗദി സേന വ്യോമാക്രമണം നടത്തിയതായും റിപ്പോർട്ട് വ്യക്തമാക്കുന്നു.
തായിസിനെയും യെമൻ സർക്കാരിന്റെ ആസ്ഥാനമായ ഏദനെയും ബന്ധിപ്പിക്കുന്ന പ്രധാന പാത ഹൂതികൾ വിച്ഛേദിച്ചതായും റിപ്പോർട്ടുണ്ട്. യെമൻ സർക്കാർ സേനയ്ക്കായി തന്ത്രങ്ങൾ ആസൂത്രണം ചെയ്യുന്നതിനും ലക്ഷ്യങ്ങൾ നിശ്ചയിക്കുന്നതിനും സൗദി ഉപദേഷ്ടാക്കൾ സഹായിക്കുന്നതായാണ് റിപ്പോർട്ട്. ഹൂതികൾക്കെതിരെ ശക്തമായ നടപടി ഉണ്ടാകുമെന്ന് സൗദി സഖ്യസേന വ്യക്തമാക്കിയിട്ടുണ്ട്. ആക്രമണങ്ങൾ അവസാനിപ്പിക്കണമെന്ന് യെമൻ സേനയും മുന്നറിയിപ്പ് നൽകി.
Note ; വാർത്തയ്ക്കായി ഉപയോഗിച്ചിരിക്കുന്ന ചിത്രങ്ങൾ ബെസോറ ന്യൂസിന്റെത് അല്ല . വാർത്തയുടെ പൂർണതയ്ക്കുവേണ്ടി മറ്റ് സോഴ്‌സുകളിൽ നിന്നും എടുത്തതാണ് .
