ഫ്രാൻസിലെ ലൂർദ് തീർത്ഥാടന നഗരത്തിലെത്തിയ ഫ്രാൻസിസ് പാപ്പാ, മസബിയേൽ ഗുഹയിലെത്തി പരിശുദ്ധ കന്യകാമറിയത്തോട് പ്രാർത്ഥിച്ചു.
ആയിരക്കണക്കിന് വിശ്വാസികളുടെ സാന്നിധ്യത്തിലായിരുന്നു പാപ്പായുടെ പ്രാർത്ഥന. ഫ്രാൻസിനായി പ്രാർത്ഥിച്ച പാപ്പാ, രാജ്യത്തിന് സഹോദരസൗഹാർദ്ദത്തിന്റെ ദാനം ലഭിക്കണമെന്നാവശ്യപ്പെട്ടു.
അക്രമവും വിദ്വേഷവും ഒഴിവാക്കി എല്ലാവർക്കും സമാധാനത്തിലും ശാന്തതയിലും ജീവിക്കാനും ജോലി ചെയ്യാനും കുടുംബം ആരംഭിക്കാനും കഴിയുന്ന ഒരു സൗഹാർദ്ദപരമായ സമൂഹം കെട്ടിപ്പടുക്കാൻ ഫ്രാൻസിലെ ജനങ്ങളെ സഹായിക്കണമെന്നാണ് പാപ്പാ പരിശുദ്ധ കന്യകാമറിയത്തോട് പ്രാർത്ഥിച്ചത്.
ദരിദ്രരെയും ഏറ്റവും കൂടുതൽ സഹായം ആവശ്യമുള്ളവരെയും എപ്പോഴും പിന്തുണയ്ക്കണമെന്നും പാപ്പാ പ്രാർത്ഥനയിൽ ആവശ്യപ്പെട്ടു.
ഫ്രാൻസിന് ജ്ഞാനികളും ഉദാരമനസ്കരുമായ നേതാക്കളെ ലഭിക്കണമെന്നും, ത്യാഗം ചെയ്യാൻ തയ്യാറുള്ളവരും രാജ്യത്തിന്റെ വെല്ലുവിളികൾക്ക് മറുപടി നൽകാൻ കഴിവുള്ളവരും പൊതുനന്മയ്ക്കായി പ്രവർത്തിക്കാൻ ആഗ്രഹിക്കുന്നവരുമായ നേതാക്കൾക്കായി പരിശുദ്ധ കന്യകാമറിയത്തോട് പാപ്പാ പ്രാർത്ഥിച്ചു.
രാജ്യങ്ങളുടെ കുടുംബത്തിൽ ഫ്രാൻസിനെ സമാധാനത്തിൽ നിലനിർത്താനും, അടിസ്ഥാന മനുഷ്യാവകാശങ്ങളുടെ സംരക്ഷണത്തിനും ലോകസമാധാനത്തിനും വേണ്ടി ഫ്രാൻസിന്റെ ശബ്ദം ഉയരാനും പരിശുദ്ധ കന്യകാമറിയത്തിന്റെ സഹായം പാപ്പാ തേടി.
യുദ്ധത്തിന്റെ മാനസികാവസ്ഥ എന്നന്നേക്കുമായി ഉപേക്ഷിക്കണമെന്നും പാപ്പാ പ്രാർത്ഥനയിൽ ആവശ്യപ്പെട്ടു.
ലൂർദിലെ ഗുഹയിൽ ഉയരുന്ന പ്രാർത്ഥനകൾ ലോകത്തിന്റെ വിവിധ ഭാഗങ്ങളിൽ നിന്നെത്തുന്ന വിശ്വാസികളുടെ വിശ്വാസവും ക്രൈസ്തവ കുടുംബങ്ങളുടെ ആത്മീയ തീക്ഷ്ണതയും പുതുക്കട്ടെയെന്നും പാപ്പാ പ്രാർത്ഥിച്ചു.
രോഗികളും ദുരിതമനുഭവിക്കുന്നവരും അവരെ പരിചരിക്കുകയും പിന്തുണയ്ക്കുകയും ചെയ്യുന്നവരും ഉൾപ്പെടെ ലൂർദിലെത്തുന്ന എല്ലാവരുടെയും പ്രാർത്ഥനകൾക്കും പാപ്പാ തന്റെ പ്രാർത്ഥനയിൽ ഇടം നൽകി. അവർക്ക് ശക്തിയും സൗഖ്യവും ലഭിക്കണമെന്നായിരുന്നു പാപ്പായുടെ പ്രാർത്ഥന.
പ്രാർത്ഥനയ്ക്കുശേഷം പരിശുദ്ധ കന്യകാമറിയത്തിന് സമർപ്പിക്കുന്ന പരമ്പരാഗത ഭക്തിയുടെ ഭാഗമായി പാപ്പാ ഒരു സ്വർണ്ണ റോസ് സമ്മാനിച്ചു.
Note ; വാർത്തയ്ക്കായി ഉപയോഗിച്ചിരിക്കുന്ന ചിത്രങ്ങൾ ബെസോറ ന്യൂസിന്റെത് അല്ല . വാർത്തയുടെ പൂർണതയ്ക്കുവേണ്ടി മറ്റ് സോഴ്‌സുകളിൽ നിന്നും എടുത്തതാണ് .
